2024 er eit stort jubileumsår i Noreg. Vi feirar at det er 1000 år sidan kristenretten vart innført på Moster, og 750 år for Magnus Lagabøte si landslov. Landslova av 1274 vart skriven i Bergen, men kva fekk lova å sei i Hardanger? – Meir enn vi tenkjer på til dagleg i alle fall.
Frå Moster til Hardanger
Helga 16. - 17. november inviterer Hardanger Historielag, Kyrkjene i Ullensvang og Fortidsminneforeningen Hardanger Lokallag til temadagar omkring desse spørsmåla. Laurdagen er programmet lagt til Lofthus og søndagen til Kinsarvik.
“Vår eigen” kulturvitar Guttorm Rogdaberg skal ha foredrag om Ullensvang kyrkje som vart bygt på 1200-talet. Han vil avsløra fleire spor og detaljer i bygget som går direkte til Magnus Lagabøte, eller “kongen som ville Noreg vel” som Guttorm omtalar han i sitt eige Magnuskvad. Og ute på gravplassen får vi høyra kva fleire sentrale gravminne fortel.
